يابقرة صبي بترول
بقلم : أحمد غراب / عمود " طائر بلا جناح "
يا بقرة صبي بترول.. عبدالله في اسطنبول وعياله في قصعة فول، كلهم يشتوا بترول، والبترول يشتي مسؤول، والمسؤول يشتي طابور، والطابور يشتي بترول، والبترول صفر صافر، وصافر تشتي طريق والطريق يشتي أمان والأمان يشتي ضمان والضمان يشتي ضمار والضمار يتشي حمار والحمار يتشي علف والعلف يشتي حقول والحقول تشتي ماطور والماطور يشتي بترول.
***
يا بقرة صبي ديزل عبدالله راكب سيكل وعياله يشتوا عصيد والعصيد تشتي مرق والمرق تشتي دجاج والدجاج تشتي مدج والمدج تشتي ديوك والديوك تشتي صياح والصياح تشتي لسان واللسان يشتي عقول والعقول تشتي علوج والعلوج تشتي عجول.
****
يا بقرة غني هندي عبدالله يتشتي مندي وعياله يشتوا كعكة والكعكة تشتي حركة والحركة تشتي آلي والآلي يشتي قبيلي والقبيلي عدو نفسه.. ونفسه تشتي حجر والحجر من القاع والدم من راس القبيلي
***
يا بقرة طفي لصي عبدالله باع التلفون وعياله سووا رنه والرنة تشتي الوه وألوه يشتي وحدات والوحدة تشتي رصيد والرصيد يشتي هاتف والهاتف يشتي شاحن والشاحن يشتي كهرباء والكهرباء طفي طفي وطفي يتشتي شمعة والشمعة تشتي دمعة والدمعة تشتي فيروز وفيروز تشتي عصفور والعصفور يشتي عش والعش يشتي شجرة والشجرة تشتي وطن والوطن يشتي عمل.
****
يا بقرة عشي رشي عبدالله يشتي يمشي وعياله يشتو محشي والمحشي يشتي كوسة والكوسة تشتي دقة والدقة تشتي ثومة والثومة تشتي بسباس والبسباس يشتي عباس وعباس يشتي فرناس وفرناس يشتي جناح والجناح يشتي يطير ويطير يشتي بترول يا بقرة صبي بترول.
اذكروا الله وعطروا قلوبكم بالصلاة على النبي
اللهم ارحم ابي واسكنه فسيح جناتك وجميع اموات المسلمين
من مقالات احمد غراب / عمود " طائر بلا جناح "
ليست هناك تعليقات:
إرسال تعليق